होम » आगामी शैक्षिक सत्रबाट कक्षा ४, ५ र ९ को नयाँ पाठ्यक्रम लागू हुने

आगामी शैक्षिक सत्रबाट कक्षा ४, ५ र ९ को नयाँ पाठ्यक्रम लागू हुने

by नागरिक टुडे

आगामी शैक्षिक सत्र २०७९ बाट कक्षा ४, ५ र ९ को नयाँ पाठ्यक्रम कार्यान्वयन हुने निर्णय भएको छ । राष्ट्रिय पाठ्यक्रम विकास तथा मूल्यांकन परिषद्को बिहीबार बसेको ८९ औं बैठकले हाल परीक्षण भइरहेका पाठ्यक्रमहरु कार्यान्वयन गर्ने निर्णय गरेको हो ।

कक्षा ४, ५ र ९ का पाठ्यक्रम देशका २८ वटा विद्यालयमा परीक्षण भइरहेको छ । अर्को शैक्षिक सत्रदेखि कक्षा १० को बैठकले प्राविधिक शिक्षातर्फ कक्षा ११ देखि १२ सम्मका नयाँ पाठ्यक्रम स्वीकृत गरेको पाठ्यक्रम विकास केन्द्रका महानिर्देशक अणप्रसाद न्यौपानेले बताए । उनले भने, ‘हामीसँग भएका प्राविधिक धारका पाठ्यक्रमहरु एचएसईबीले बनाएका पुराना थिए । त्यसलाई विस्थापन गर्ने गरी नयाँ पाठ्यक्रम तयार भएको छ ।’ शिक्षामन्त्रीको अध्यक्षतामा बसेको परिषद् बैठकले मदरसामा अनिवार्य विज्ञान तथा प्रविधि विषयको सट्टामा दिनियात विषय अध्ययन गर्न पाउने निर्णय गरेको छ ।

मातृभाषामा ऐच्छिक पढाउन सकिने गरी पाठ्यक्रम बन्न सक्ने

बैठकले नेपालको संविधानमा मातृभाषाको व्यवस्था गरेअनुरुप थप अन्य मातृभाषाको पाठ्यक्रम पनि बन्न सक्ने र ऐच्छिक विषयको रुपमा पठनपाठन हुनसक्ने गरी व्यवस्थापन गर्ने निर्णय समेत गरेको छ । केन्द्रका महानिर्देशक न्यौपानेले भने, ‘अब अरु मातृभाषाका विषय पनि ऐच्छिक विषयको रुपमा पढाउन सकिने र त्यसका लागि पाठ्यक्रम तयार गर्न सकिने गरी निर्णय गरिएको छ ।’ बैठकले जापानी, कोरियन, चिनियाँ लगायतका विदेशी भाषाको पाठ्यक्रम पनि स्वीकृत गरेको केन्द्रले जनाएको छ ।

यिनिहरू पढ्न छुटे की ?